ഗിരീഷ് എ.ഡി. സംവിധാനം ചെയ്ത നിവിന് പോളി-മമിത ചിത്രം 'ബെത്ലഹേം കുടുംബ യൂണിറ്റി'ലെ പുതിയ ഗാനം 'ചാചാചിചിചൂ' പ്രേക്ഷകര്ക്കിടയില് വന് തരംഗമാകുന്നു. ചിത്രത്തിലെ നിര്ണ്ണായക നിമിഷത്തില് ഒരു ഗോവന് യാത്രയുടെ മൂഡ് പകര്ന്നു നല്കുന്ന ഒന്നാണ് ഈ ഗാനം. വിഷ്ണു വിജയ് ഒരുക്കിയിരിക്കുന്ന ചടുലമായ ഈണത്തിന് സുഹൈല് കോയയാണ് രസകരമായ വരികള് ഒരുക്കിയിരിക്കുന്നത്. വ്യത്യസ്തമായ ആലാപന ശൈലിയില് വാഗു മസാന് ആണ് ഗാനം ആലപിച്ചിരിക്കുന്നത്.
യൂട്യൂബിലും മറ്റ് മ്യൂസിക് പ്ലാറ്റ്ഫോമുകളിലും ഇതിനോടകം തന്നെ ട്രെന്ഡിംഗ് ലിസ്റ്റില് ഗാനം ഇടംപിടിച്ചു കഴിഞ്ഞു. ജസ്റ്റിന്റേയും ആഷ്ലിയുടേയും കുടുംബാംഗങ്ങളുടെ രസകരമായ ഗോവ യാത്രാ പശ്ചാത്തലത്തില് ഒരുക്കിയ ഈ പാട്ട് തീയേറ്ററുകളില് വലിയ ആഘോഷമായാണ് പ്രേക്ഷകര് ഏറ്റെടുത്തിരുന്നത്.
മലയാളത്തില് വന് വിജയം കൊയ്ത 'ബെത്ലഹേം കുടുംബ യൂണിറ്റ്' അതിര്ത്തികള് കടന്നും വന് വിജയത്തിലേക്ക് നീങ്ങുകയാണ്. മലയാളത്തിലെ വന് സ്വീകരണത്തിന് ശേഷം കഴിഞ്ഞദിവസം തിയേറ്ററുകളിലെത്തിയ ചിത്രത്തിന്റെ തമിഴ്, തെലുങ്ക് പതിപ്പുകള്ക്ക് അന്യഭാഷാ പ്രേക്ഷകര്ക്കിടയിലും മികച്ച പ്രതികരണമാണ് ലഭിച്ചുകൊണ്ടിരിക്കുന്നത്.
ഗിരീഷ് എ.ഡി - ഭാവന സ്റ്റുഡിയോസ് കൂട്ടുകെട്ടിന്റെ ഈ സൂപ്പര്ഹിറ്റ് ചിത്രം അന്യഭാഷകളിലും പുതിയ ബോക്സ് ഓഫീസ് ചരിത്രം കുറിച്ച് കുതിപ്പ് തുടരുകയാണ്. ഫഹദ് ഫാസില്, ദിലീഷ് പോത്തന്, ശ്യാം പുഷ്കരന് എന്നിവര് ചേര്ന്നാണ് ചിത്രം നിര്മ്മിച്ചിരിക്കുന്നത്. 'പ്രേമലു'വിന് ശേഷം ഭാവന സ്റ്റുഡിയോസും ഗിരീഷ് എ ഡിയും ഒന്നിച്ച ഈ രണ്ടാം ചിത്രവും 200 കോടി കളക്ഷനും കടന്ന് കുതിപ്പ് തുടരുകയാണ്.
Content Highlights: The lyrical video of the 'Bethlehem Family Unit' Goa trip song has been released